ကိုဗစ် ကာလ မဲတောင်းရတာ အားနာကြောင်း ဦးသန်းဌေး ပြော

Posted on

ကိုဗစ်-၁၉ ဖြစ်ပွားနေတဲ့ကာလအတွင်း ပြည်သူတွေစီက မဲရဖို့တောင်းဆိုရတာ အားနာတယ်လို့ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီ ဥက္ကဋ္ဌ ဦးသန်းဌေးက ပြောပါတယ်။ စက်တင်ဘာလ (၁၈)ရက် ညပိုင်းက ပါတီရဲ့ လူမှုကွန်ရက် စာမျက်နှာ ဖေ့ဘွတ်ကနေတစ်ဆင့် ပြောကြားခဲ့တာပါ။

ဒီအချိန်မှာ ကိုယ် အာဏာရဖို့ အနိုင်ရဖို့အတွက် လူထုဆီက မဲတောင်းရမှာကျတော့ တော်တော်မှ အားနာစရာ ကိစ္စတစ်ခုပါ။ အခက်အခဲပေါင်းစုံ ကြုံနေရတာတွေကို နှစ်သိမ့်ကူညီဖို့ တာဝန်ယူဖြေရှင်းဖို့ထက် ကိုယ့်အတွက်ပဲ လာတောင်းနေတဲ့သူမျိုး၊ ယဉ်ကျေးတဲ့ စကားလုံးကို ရှာကြံသုံးပြီး ဥပမာ နှိုင်းရရင်တော့ ခန္ဓာပျက်သုန်း အသက်ဆုံးရှုံးလို့ သူတစ်ပါး ပူဆွေး ဒုက္ခရောက်နေတဲ့ အချိန်မှာ လောင်းကစားဝိုင်းလုပ်ပြီး စီးပွားလာရှာတဲ့ လူစားမျိုးနဲ့ တစ်တန်းတည်းသတ်မှတ်ခံရမှာတော့ အလွန်တရာ စိုးရိမ်ပါတယ်” လို့ ဦးသန်းဌေးက ပြောပါတယ်။

လက်ရှိမှာ နိုင်ငံအရေး၊ပြည်သူ့အရေး မျှော်တွေးပူပန်သူတွေက ကိုဗစ်ကာလ ရွေးကောက်ပွဲ ကျင်းပမယ့် အပေါ်ပြောဆိုနေကြပေမယ့် ရွေးကောက်ပွဲကတော့ ကြိုတင်စီစဉ်ထားတဲ့ အချိန်ဇယားအတိုင်း သွားမယ်လို့ ယူဆထားတယ်လို့လည်း ဆိုပါတယ်။ ဒါကြောင့် နိုင်ငံရေးပါတီတစ်ခုအနေနဲ့ ရွေးကောက်ပွဲကျင်းပရာမှာ မပြိုင်ဘဲ နေလို့ မရတာကြောင့် ပြိုင်ပွဲဝင်ဖို့ လိုအပ်တာတွေကို အကောင်းဆုံးပြင်ဆင်ထားတယ်လို့ ဦးသန်းဌေးက ပြောပါတယ်။ လာမယ့် ရွေးကောက်ပွဲက နန်းလုပွဲ ၊ ပလ္လင်လုပွဲမဟုတ်ဘဲ ဘက်ပေါင်းစုံက ပွေလိမ်ရှုပ်ထွေးနေတဲ့ နိုင်ငံတော် အရှုပ်ထုပ်ကြီး အမွေလုတဲ့ ပွဲ ဖြစ်တယ်လို့ ဦးသန်းဌေးကဆိုပါတယ်။

ပြည်သူလူထုအနေနဲ့ ကိုယ့်တိုင်းပြည် အခြေအနေကို ဘယ်လို သဘောပေါက်ထားကြပါသလဲ။အဘက်ဘက်က ပြည့်စုံပြီး အေးချမ်းသာယာ ပျော်ရွှင်တင့်တယ် နေချင်စဖွယ်ဖြစ်နေပြီလို့ ယုံကြည်ကြရင်တော့ဖြင့် အသင့် နန်းထိုင် မယ့် ပုဂ္ဂိုလ်တွေကို ရွေးချယ်လိုက်ကြပါခင်ဗျာ။ တိုင်းပြည်အနှံ၊နန်းရင်ပြင်အနှံ အမှိုက်ဗလပွနဲ့ တစ်စစီကောက်ရှင်းရတော့မယ့် အခြေအနေလို့ ရှုမြင်ကျရင်လည်းပဲ ရှင်းနိုင် လင်းနိုင် သပ်ရပ်ခန့်ညားအောင် တည်ဆောက် ပြုပြင်နိုင်မယ့်သူကိုသာ တာဝန်ပေးကြရမှာပါခင်ဗျာ”လို့ ဦးသန်းဌေးက ပြောပါတယ်။

ပြည်သူတွေအနေနဲ့ ဒီမိုကရေစီ ရွေးကောက်ပွဲတွေက တစ်ဆင့် မတူကွဲပြားတဲ့ နိုင်ငံရေးပါတီ (၂)ခု ဦးဆောင်တဲ့ အစိုးရကာလ နှစ်ရပ်ကို ဖြတ်သန်းပြီးဖြစ်လို့ အပြောနဲ့ အလုပ် ပြီးမြောက်မှု ၊ တာဝန်ခံခြင်း တာဝန်လွှဲချခြင်း၊ ဝါဒဖြန့် ရေးသားပြောဆိုမှုတွေက ဘယ်လိုဖြစ်တယ်ဆိုတာကို နှိုင်းယှဉ်မှုနဲ့ သိမြင်ထားပြီးဖြစ်တယ်လို့ ဆိုပါတယ်။ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီ ဥက္ကဋ္ဌ ဦးသန်းဌေးက လာမယ့်ရွေးကောက်ပွဲမှာ နေပြည်တော် ဇေယျာသီရိ မဲဆန္ဒနယ်က ဝင်ရောက်ယှဉ်ပြိုင်သွားမှာဖြစ်ပြီး ပါတီအနေနဲ့တော့ တစ်နိုင်ငံလုံးမှာ ကိုယ်စားလှယ်လောင်း (၁၁၀၀)ကျော် ဝင်ရောက်ယှဉ်ပြိုင်သွားမှာ ဖြစ်ပါတယ်။

Leave a Reply

Your email address will not be published. Required fields are marked *