ကိုဗစ် ပိုးရှိ / မရှိ မြန်ဆန်စွာစမ်းသပ်နိုင်သော ပစ္စည်းများ တောင်ကိုရီးယားမှ မှာယူထား

Posted on

မြန်မာနိုင်ငံအတွက် ကိုဗစ်-၁၉ ရောဂါပိုး ကူးစက်ခံရခြင်း ရှိ/ မရှိကို မြန်ဆန်စွာ စမ်းသပ်နိုင်တဲ့ ကိရိယာများကို တောင်ကိုရီးယားနိုင်ငံကနေ မှာယူထားတယ်လို့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဒီကနေ့ စက်တင်ဘာ (၂၅) ရက် ည(၈) နာရီမှာ ထုတ်လွှင့်တဲ့ မိန့်ခွန်းမှာ ထည့်သွင်းပြောကြားလိုက်ပါတယ်။နိုင်ငံအတွင်း ကိုဗစ်-၁၉ ရောဂါဖြစ်ပွားမှု အခြေအနေနှင့်စပ်လျဉ်းပြီး ပြည်သူသို့ အစီရင်ခံ တင်ပြသည့် အဲဒီမိန့်ခွန်းမှာ နိုင်ငံတော်အနေနဲ့ ကိုဗစ်-၁၉ ရောဂါပိုး ရှိ/ မရှိ မြန်မြန်ဆန်ဆန် စစ်ဆေးနိုင်တဲ့ ပစ္စည်းဆေးဝါးတစ်သိန်းကို တောင်ကိုရီးယားနိုင်ငံကို မှာကြားထားပြီး တောင်ကိုရီးယားနိုင်ငံကလည်း ကန်ဒေါ်လာ ငါးသိန်းဖိုး လှူဒါန်းမှာ ဖြစ်တယ်လို့ ဒေါ်အောင်ဆန်းစု ကြည်က ပြောပါတယ်။

ဒီပစ္စည်းတွေဟာ မြန်မာနိုင်ငံကို ရက်ပိုင်းအတွင်း ရောက်ရှိလာမှာ ဖြစ်ပြီး ခရိုင်နဲ့ မြို့နယ်တွေကို ဖြန့်ဖြူးပေးသွားမှာ ဖြစ်တယ်လို့လည်း ပြောပါတယ်။ဒါကြောင့် ပြည်သူတွေအနေနဲ့ ကိုဗစ်-၁၉ ရောဂါကူးစက်ခံရခြင်း ရှိ/မရှိ စစ်ဆေးမှုတွေ ပြုလုပ်မယ်ဆိုရင် ခရိုင်နဲ့ မြို့နယ်ဆေးရုံတွေကို သွားရောက်ကြဖို့လည်း နိုင်ငံတော်အတိုင်ပင်ခံပုဂ္ဂိုလ်က တိုက်တွန်း လိုက်ပါတယ်။အဲဒီလို ခရိုင်နဲ့ မြို့နယ်ဆေးရုံတွေမှာ ကိုဗစ်-၁၉ ရောဂါပိုး စစ်ဆေးမှုတွေကို ပြုလုပ်ပေးမယ်ဆိုရင် လူအင်အားလည်း လိုအပ်တာကြောင့် ပုဂ္ဂလိကပိုင်းဆိုင်ရာကျန်းမာရေးဝန်ထမ်းတွေအနေနဲ့ ဝိုင်းဝန်းကူညီ ပေးကြဖို့ကိုလည်း တိုက်တွန်းလိုက်ပါတယ်။

ဒါ့အပြင် နိုင်ငံတော်အတိုင်ပင်ခံပုဂ္ဂိုလ်က လက်ရှိမှာ ကိုဗစ်-၁၉ ရောဂါကူးစက်မှုကို ကာကွယ်နိုင်တဲ့ ကာကွယ်ဆေးမရှိသေးပေမယ့်၊ နိုင်ငံအချို့က ကာကွယ်ဆေးထုတ်လုပ်ဖို့ ကြိုးစားနေရာမှာ ကမ္ဘာ့ကျန်းမာရေးအဖွဲ့ (WHO)က အသိအမှတ်ပြု ကာကွယ်ဆေးထုတ်လုပ်နိုင်ပြီ ဆိုရင်တော့ မြန်မာနိုင်ငံ ပြည်သူလူထုအတွက် စောနိုင်သမျှ စောစော ကာကွယ်ဆေးရဖို့အတွက် အခုကတည်းက ကြိုတင်စီစဉ် ဆောင်ရွက်နေပါတယ်လို့လည်း ပြောကြားလိုက်ပါတယ်။

Leave a Reply

Your email address will not be published. Required fields are marked *