ကိုရိုနာဗိုင်းရပ်စ် ဗဟိုချက် ဝူဟန်တွင် ဗိုင်းရပ်စ်ကြောင့် သေဆုံးသူ ၅၀ ရာခိုင်နှုန်းတိုးလာဟု တရုတ်က ပြင်ဆင်ကြေညာ

Posted on

တရုတ်တွင် ကိုရိုနာဗိုင်းရပ်စ်ကူးစက်မှု ဗဟိုချက် ဖြစ်သော ဝူဟန်မြို့ ၌ ကိုဗစ်-၁၉ ကြောင့် သေဆုံးသူ ၁,၂၉၀ ဦး ထပ်တိုးလာပြီး ၅၀ ရာခိုင်နှုန်း ပိုများခဲ့ကြောင်း၊ ကူးစက်မှု အဆိုးဆုံးအချိန်တွင် အလွန်အကျွံ လူနာလက်ခံထားရသော ကျန်းမာရေးစင်တာများ၌ လူနာလက်ခံနိုင်စွမ်း မလုံလောက်မှုကြောင့် ကူးစက်ခံရသူ တွက်ချက်မှု လျော့နည်းခဲ့ခြင်း ဖြစ်ကြောင်း တရုတ်အစိုးရ မီဒီယာ Xinhua က ဧပြီ ၁၇ တွင် ‌ဖော်ပြခဲ့သည်။

 

ကိုရိုနာဗိုင်းရပ်စ်ကြောင့် ဝူဟန်တွင် သေဆုံးမှုသည် ၃,၈၆၉ ဦးရှိခဲ့ပြီး တရုတ်၌ သေဆုံးသူအများဆုံးနေရာ ဖြစ်သည်။လူဦးရေ ၁၁ သန်းရှိသော ဝူဟန်တွင် ကိုရိုနာဗိုင်းရပ်စ် ကူးစက်ခံရသူ ၅၀,၃၃၃ ဦး ဖြစ်ကြောင်းလည်း အာဏာပိုင်များက ပြင်ဆင်ခဲ့သည်။၃၂၅ ဦးတိုးလာခဲ့သော ဝူဟန်တွင် ကူးစက်ခံရမှုသည် တရုတ်တွင် စုစုပေါင်း ကူးစက်ခံရသူ ၈၂,၃၆၇ ဦး၏ သုံးပုံနှစ်ပုံခန့်ရှိသည်။ယင်းစာရင်းအပြောင်းအလဲက တရုတ်တစ်နိုင်ငံလုံးတွင် ကိုရိုနာဗိုင်းရပ်စ်ကြောင့် သေဆုံးသူဦးရေသည် ၃၉ ရာခိုင်နှုန်းတိုးလာကာ ၄,၆၃၂ ဦးအထိ ရှိလာခဲ့ကြောင်း တရားဝင်ထုတ်ပြန်သော စာရင်းအင်းများကို ကိုးကားပြီး အေအက်ဖ်ပီက ဖော်ပြခဲ့သည်။

ဝူဟန်၏ ကူးစက်ရောဂါကာကွယ်၊ထိန်းချုပ်ရေး အချက်အလက်စနစ်၊ မြို့၏ဈာပနဝန်ဆောင်စနစ်၊ မြူနီစီပယ်ဆေးရုံအာဏာပိုင်အဖွဲ့၏သတင်းအချက်အလက်စနစ်၊ ထပ်ကျော့ရေတွက်မှုများအား ဖယ်ရှားသည့် နယူကလိယက်အက်ဆစ်စစ်ဆေးမှုစနစ်တို့မှ ရရှိသော အချက်အလက်များကို နှိုင်းယှဉ်စစ်ဆေးပြီးနောက် ပြင်ဆင်ထားသော အချက်အလက်များကို ရရှိခဲ့ခြင်း ဖြစ်သည်ဟု တာဝန်ရှိသူတစ်ဦးကို ကိုးကားပြီး Xinhua က ဖော်ပြခဲ့သည်။ဝူဟန်တွင် ဇန်နဝါရီကတည်းက ကိုရိုနာဗိုင်းရပ်စ် ကူးစက်မှုနှင့်သေဆုံးမှုများ ဖြစ်နေခဲ့ပြီး သတင်းထုတ်ပြန်ခဲ့ခြင်း မရှိသောကြောင့် တရုတ်၏သတင်းအချက်အလက် ထုတ်ပြန်မှု တိကျခြင်းကို မယုံသင်္ကာ ဖြစ်နေသည်မှာ ကြာပြီ ဖြစ်သည်။

သတင်းအချက်အလက် မရေရာမှုက တရုတ်တာဝန်ရှိသူများသည် ကိုရိုနာဗိုင်းရပ်စ် ကူးစက်မှု၏ သက်ရောက်မှုကို လျှော့ချရန် ကြိုးပမ်းနေခဲ့ပြီး ဗိုင်းရပ်စ်ဘေးကို အချိန်တိုအတွင်း ထိန်းချုပ်နိုင်မည့် အခွင့်အရေးကို ဖြုန်းတီးခဲ့ကြောင်း စွပ်စွဲမှုများကို ဖြစ်ပေါ်စေခဲ့သည်။

Leave a Reply

Your email address will not be published. Required fields are marked *