၎ ရက်ကျော်အတွင်း နောက်ထပ် ကူးစက်ခံရသူ ၁ သန်းကျော် တိုးလာခဲ့ပါတယ်။ကမ္ဘာတစ်ဝန်း COVID-19 ကူးစက်ခံရသူ အရေအတွက်ဟာ ဩဂုတ် ၂၆ ရက် မနက်အစောပိုင်းမှာ ၂၄ သန်း ကျော်လွန်လာခဲ့ကြောင်း ကမ္ဘာ့နိုင်ငံအသီးသီးရဲ့ COVID-19 ဖြစ်ပွားမှုအခြေအနေ ကိန်းဂဏန်းတွေကို အချိန်နဲ့တစ်ပြေးညီ ဖော်ပြနေတဲ့ Worldometers ဝက်ဘ်ဆိုက်မှာ ဖော်ပြထားတာ တွေ့ရပါတယ်။
ယမန်နှစ် ဒီဇင်ဘာလကုန်က တရုတ်နိုင်ငံအလယ်ပိုင်း ဟူဘေးပြည်နယ် ဝူဟန်မြို့မှာ စတင်တွေ့ရှိခဲ့ရတဲ့ COVID-19 ဟာ ၈ လအတွင်း တစ်ကမ္ဘာလုံးမှာ လူဦးရေ ၂၄ သန်းကျော်ကို လျင်မြန်စွာ ကူးစက်သွားခဲ့ပါတယ်။ လက်ရှိအချိန်အထိ COVID-19 ကြောင့် ကမ္ဘာတစ်ဝန်းမှာ လူဦးရေ ၈၂၃,၀၀၀ ကျော် သေဆုံးခဲ့ပြီး ၁၆.၅ သန်းကျော် ပြန်လည်သက်သာခဲ့ပါတယ်။ပြီးခဲ့တဲ့ ဩဂုတ် ၂၁ ရက် ညဥ့်နက်ပိုင်းမှာ ကူးစက်ခံရသူ ၂၃ သန်းကျော်လွန်ခဲ့တာဖြစ်ပြီး ၄ ရက်ကျော်အတွင်း နောက်ထပ် ကူးစက်ခံရသူ ၁ သန်းကျော် တိုးလာခဲ့ပါတယ်။ COVID-19 ကြောင့် သေဆုံးသူအရေအတွက်ဟာ ဩဂုတ် ၂၁ ရက်နေ့မှာ ၇၉၉,၀၀၀ ကျော်မှ ၄ ရက်ကျော်အတွင်း ၂၄,၀၀၀ ကျော် တိုးလာခဲ့တာ တွေ့ရပါတယ်။
အမေရိကန်ဟာ ကမ္ဘာတစ်ဝန်းမှာ ကူးစက်မှုနဲ့ သေဆုံးမှုအများဆုံး နိုင်ငံဖြစ်ပြီး လက်ရှိအချိန်အထိ လူဦးရေ ၅.၉ သန်းကျော် ကူးစက်ခံခဲ့ရပြီး ၁၈၂,၀၀၀ ကျော် သေဆုံးခဲ့ပါတယ်။ ကူးစက်မှုနဲ့ သေဆုံးမှု ဒုတိယအများဆုံးဖြစ်တဲ့ ဘရာဇီးနိုင်ငံမှာလည်း COVID-19 ကူးစက်ခံရသူ ၃.၇ သန်း ကျော်လွန်လာခဲ့ပြီး သေဆုံးသူဦး ၁၁၆,၀၀၀ ကျော်ပြီဖြစ်ပါတယ်။ တစ်ကမ္ဘာလုံးမှာ တတိယမြောက် ကူးစက်မှုအများဆုံးဖြစ်တဲ့ အိန္ဒိယမှာလည်း ကူးစက်ခံရသူ ၃.၂ သန်းကျော်နဲ့ သေဆုံးသူ ၆၀,၀၀၀ နီးပါးရှိလာခဲ့ပါတယ်။
COVID-19 ကပ်ရောဂါဟာ ဆက်လက် ကျယ်ပြန့်ဖြစ်ပွားနေဆဲ ဖြစ်ပေမဲ့ အရှေ့တောင်အာရှနဲ့ မြေထဲပင်လယ်အရှေ့ပိုင်း နေရာဒေသများကလွဲပြီး ကမ္ဘာတစ်ဝန်း ကူးစက်မှုနဲ့ သေဆုံးမှုနှုန်း နှေးကွေးသွားခဲ့ကြောင်း ကမ္ဘာ့ကျန်းမာရေးအဖွဲ့အစည်း (World Health Organization – WHO) က ဩဂုတ် ၂၄ ရက် ညပိုင်းမှာ ထုတ်ပြန်ပြောကြားခဲ့ပါတယ်။အစောပိုင်း ကူးစက်မှုတွေကို ထိန်းချုပ်နိုင်ခဲ့တဲ့ တောင်ကိုရီးယားမှာ ဆိုးလ်မြို့တော်ဧရိယာအတွင်း ကူးစက်မှုတွေ ပြန်လည်မြင့်တက်နေပြီး တစ်နိုင်ငံလုံးကို ပျံ့နှံ့သွားမယ့် အခြေအနေဖြစ်တယ်လို့ တာဝန်ရှိသူတွေက သတိပေးထားပါတယ်။ ဆိုးလ်မြို့တော်ဧရိယာအတွင်းရှိ ကျောင်းများအားလုံးကို ပြန်ပိတ်ထားပါတယ်။
ဥရောပမှာ ကူးစက်မှုတွေ ပြန်မြင့်တက်နေတဲ့ စပိန်နိုင်ငံက အတည်ပြုလူနာတွေနဲ့ ထိတွေ့မှုရှိသူတွေကို ခြေရာခံရှာဖွေရေးမှာ စစ်တပ်အင်အား အသုံးပြုသွားမယ်လို့ ပြောခဲ့ပါတယ်။ ထိုအတောအတွင်း ဟောင်ကောင်မှာ COVID-19 ကနေ ပြန်လည်သက်သာပြီးသူတစ်ဦး နောက်တစ်ကြိမ် ကူးစက်ခံရမှု ပထမဆုံးအကြိမ် တွေ့ရှိရကြောင်း သုတေသီတွေက ကြေညာခဲ့ပါတယ်။ နယ်သာလန်နဲ့ ဘယ်လ်ဂျီယံမှာလည်း ပြန်လည် ကူးစက်ခံရမှုတွေ ရှိခဲ့တယ်လို့ ဆိုပါတယ်။မြန်မာနိုင်ငံမှာ လတ်တလော သီတင်းပတ်အတွင်း ရခိုင်ပြည်နယ်မှာ ပြည်တွင်းကူးစက်မှုတွေ သိသာစွာ မြင့်တက်တွေ့ရှိလာခဲ့ရပါတယ်။ ကျန်းမာရေးနဲ့အားကစား ဝန်ကြီးဌာနက ဩဂုတ် ၂၆ ရက် မနက် ၈ နာရီအချိန် ထုတ်ပြန်မှုအရ COVID-19 အတည်ပြုလူနာသစ် ၇၀ ဦး တိုးလာခဲ့ပြီး စုစုပေါင်း ၅၇၄ ဦး ရှိလာပါတယ်။
ယနေ့ အတည်ပြုလူနာသစ် တွေ့ရှိရမှုဟာ မြန်မာနိုင်ငံမှာ COVID-19 စတင်တွေ့ရှိခဲ့စဉ်မှစပြီး လက်ရှိအချိန်အထိ နေ့အလိုက် အများဆုံး စံချိန်တင်ခဲ့တာလည်း ဖြစ်ပါတယ်။ မြန်မာနိုင်ငံမှာ COVID-19 အတည်ပြုလူနာများအနက် ၃၄၁ ဦး ပြန်လည်သက်သာခဲ့ကာ ၆ ဦး သေဆုံးခဲ့ကြောင်း သိရပါတယ်။ ဩဂုတ် ၂၅ ရက် ညပိုင်းအထိ မြန်မာနိုင်ငံမှာ လူဦးရေ ၁၄၇,၈၂၀ ဦးကို COVID-19 စစ်ဆေးခဲ့ကြောင်းနဲ့ စောင့်ကြည့်လူနာ ၇,၃၁၁ ဦးရှိကြောင်းလည်း ကျန်းမာရေးနဲ့အားကစား ဝန်ကြီးဌာနရဲ့ ဝက်ဘ်ဆိုက်မှာ ဖော်ပြထားပါတယ်။
