ထိုင်းရှိ မြန်မာနိုင်ငံသား အများအပြား ပြန်လည်ဝင်ရောက်နေသဖြင့် နိုင်ငံအတွင်းသို့ COVID-19 ရောဂါ ဝင်ရောက် ဖြစ်ပွားနိုင်ခြေ မြင့်မားလာ

Posted on

ထိုင်းနိုင်ငံရှိ မြန်မာနိုင်ငံသား အများအပြား ပြန်လည်ဝင်ရောက်နေသဖြင့် နိုင်ငံအတွင်းသို့ COVID-19 ရောဂါ ဝင်ရောက် ဖြစ်ပွားနိုင်ခြေ မြင့်မားလာပြီး ၎င်းတို့အား သတ်မှတ်နေရာများတွင် အသွားအလာကန့်သတ်ခြင်း ဆောင်ရွက်ရန် မဖြစ်နိုင်သောကြောင့် သက်ဆိုင်ရာ နေအိမ်များတွင်သာ ကန့်သတ်ဆောင်ရွက်ရမည်ဟု ပြည်ထောင်စုဝန်ကြီး ဒေါက်တာမြင့်ထွေးက ပြောကြားခဲ့သည်။ကျန်းမာရေးနှင့်အားကစားဝန်ကြီးဌာန၊ ရုံးအမှတ် (၄)၊ နေပြည်တော်၌ COVID-19 ရောဂါကာကွယ်ထိန်းချုပ်ရေး ဗဟိုအဆင့် လုပ်ငန်းညှိနှိုင်း အစည်းအဝေး (၃၈/၂၀၂၀)ကို မတ်၂၂ ညနေ ၅နာရီခွဲတွင်ကျင်းပခဲ့ပြီး ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေး တတ်ရောက်ခဲ့ကာ အဆိုပါအစည်းအဝေးတွင် ပြောကြားခဲ့ခြင်းဖြစ်သည်ဟု ကျန်းမာရေးနှင့် အားကစားဝန်ကြီးဌာန၏ ထုတ်ပြန်ချက်အရ သိရသည်။

ယင်းအစည်းအဝေးတွင် ပြည်ထောင်စုဝန်ကြီးက COVID-19 ရောဂါသည် ကမ္ဘာ့နိုင်ငံပေါင်း (၁၈၅) သို့ ကူးစက် ပြန့်ပွားနေပြီး ယခုရက်ပိုင်းအတွင်း ထိုင်းနိုင်ငံတွင် အလုပ်လုပ်ကိုင်နေသော မြန်မာ နိုင်ငံသား အများအပြားသည် ပြည်တွင်းသို့ ဝင်ရောက်နေပြီ ဖြစ်သဖြင့် နိုင်ငံတွင်းသို့ ရောဂါဝင်ရောက် ဖြစ်ပွားနိုင်ချေသည် ပိုမိုမြင့်မားလာကြောင်း၊ပြန်လည်ဝင်ရောက်လာကြသူများသည် အလွန်များပြားသဖြင့် ၎င်းတို့အား သတ်မှတ်နေရာများတွင် အသွားအလာကန့်သတ်ခြင်း (facility quarantine) ကိုဆောင်ရွက်ရန် မဖြစ်နိုင်သဖြင့် ၎င်းတို့၏ သက်ဆိုင်ရာ နေအိမ်များတွင် အသွားအလာကန့်သတ်ခြင်း (home quarantine) ကို ဆောင်ရွက်ရမည်ဖြစ်ကြောင်း ပြောကြားသည်။ထိုသူများအနေဖြင့် သတ်မှတ်ထားသည့် အချက်များကို အသိစိတ်ဓာတ်ရှိစွာဖြင့် တိကျစွာလိုက်နာကာ (၁၄) ရက်တာကာလအထိ နေအိမ်တွင် အသွားအလာ ကန့်သတ်နေထိုင်ရမည်ဖြစ်ကြောင်း၊သို့မှသာ ရောဂါဖြစ်ပွားမှု ရှိပါက ချက်ချင်းသိရှိကာ လျင်မြန်စွာကုသမှု ပေးနိုင်မည်ဖြစ်ပြီး မိမိ၏ မိဘ၊ ဆွေမျိုးများနှင့် အိမ်နီးချင်းများကို ရောဂါ မကူးစက်စေရန် ထိရောက်စွာ တားဆီး ထိန်းချုပ် နိုင်မည်ဖြစ်ကြောင်းကို ၎င်းတို့အား သေချာစွာ ပြောကြား အသိပေးရမည်ဖြစ်ကြောင်း ပြောကြားသည်။

ထို့ပြင် နေအိမ်များတွင် အသွားအလာ ကန့်သတ်နေထိုင်သူများအနေဖြင့် နေ့စဉ် သက်ဆိုင်ရာ ကျန်းမာရေးဌာနသို့ တယ်လီဖုန်းဖြင့် မဖြစ်မနေ သတင်းပေးပို့ရမည် ဖြစ်ကြောင်း၊လိုက်နာဆောင်ရွက်ရမည့်အချက်များကို ဆောင်ရွက်ခြင်း ရှိ၊ မရှိကိုလည်း ကျန်းမာရေးဝန်ထမ်းများနှင့် အထွေထွေအုပ်ချုပ်ရေးဝန်ထမ်းများက ပြည်သူများ၏ ပူးပေါင်းပါဝင်မှု ဖြင့် ကြီးကြပ်ဆောင်ရွက်ရမည်ဖြစ်ကြောင်း ပြောကြားသည်။ထို့အတူ ဟိုတယ်လုပ်ငန်းရှင်များအသင်းမှ တာဝန်ရှိသူများနှင့် ချိတ်ဆက်ညှိနှိုင်းပြီးသည်ဖြစ်၍ ဟိုတယ် အချို့ကို အသွားအလာကန့်သတ်ပြီးစောင့်ကြပ်ကြည့်ရှုမည့် နေရာ အဖြစ်သတ်မှတ်ပြီး ဟိုတယ်များ၌ ထားရှိပြီး အသွားအလာကန့်သတ်ခြင်းကို ဆောင်ရွက်ရန် စတင်လုပ်ဆောင်နေပြီဖြစ်ကြောင်း၊မန္တလေးတိုင်းဒေသကြီးတွင်လည်း အသွားအလာကန့်သတ် စောင့်ကြပ်ကြည့်ရှုခြင်း ဆောင်ရွက်ရန် နေရာများကို တိုင်းဒေသကြီး အစိုးရအဖွဲ့နှင့် ပူးပေါင်းဆောင်ရွက်လျက်ရှိသည်ဟု ကျန်းမာရေးဝန်ကြီးဌာန၏ ထုတ်ပြန်ချက်အရ သိရသည်။

Leave a Reply

Your email address will not be published. Required fields are marked *