မိမိအိမ်တွင်နေထိုင်ခြင်း အဆင့်ဖြင့်မရလျှင် စစ်တွေမြို့အား Lockdown ပြုလုပ်မည်

Posted on

တစ်ပတ်အတွင်း အတည်ပြုလူနာ (၄၅) ဦးအထိ ရှိလာသော စစ်တွေမြို့အား လက်ရှိ မိမိအိမ်တွင် နေထိုင်ခြင်း (Stay Home) ဖြင့် ထိန်းချုပ်နိုင်ခြင်း မရှိပါက Lockdown ပြုလုပ်သွားမည် ဖြစ်ကြောင်း ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာ မြင့်ထွေးက ပြောဆိုသည်။“အခု Stay Home (အိမ်မှာ အဓိက နေတာ) နဲ့ နိုင်ရင်နိုင်၊ မရရင် ကျနော်တို့ လုပ်ရမယ်၊ Second Stage (ဒုတိယအဆင့်)ပေါ့။ ဒါပေမယ့် ဒီအချိန်မှာ ကျနော်တို့ မလျှော့ဘူး ခင်ဗျ” ဟု ပြည်ထောင်စု ဝန်ကြီးက ပြောဆိုသည်။

လက်ရှိအချိန်တွင် စစ်တွေမြို့သို့ ကယ်ဆယ်ရေး လေယာဉ်များ ပျံသန်းမည် ဖြစ်သော်လည်း ခရီးသည်တင် လေကြောင်းလိုင်းများ ရပ်နားခြင်း၊ စစ်တွေမြို့မှ ပြန်လာသူများအား အသွားအလာ ကန့်သတ်ခြင်း၊ နှာခေါင်းတို့ဖတ်၊ အာခေါင်တို့ဖတ် ရယူကာ ဓာတ်ခွဲ စစ်ဆေးခြင်းများကို လုပ်ဆောင်လျက် ရှိကြောင်း သိရှိရသည်။သံသယလူနာများ ဓာတ်ခွဲ စစ်ဆေးခြင်းကို စစ်တွေ၌ပင် စစ်ဆေးနိုင်ရန် ဓာတ်ခွဲ ပညာရှင်များ၊ မေ့ဆေး ဆရာဝန်များ ပို့လွှတ်ခြင်း၊ အသက်ရှုစက်များ ပို့ဆောင်ခြင်းတို့ကို လုပ်ဆောင်ပြီး ဖြစ်ကြောင်း ဒေါက်တာ မြင့်ထွေးက ဆက်လက် ပြောဆိုသည်။

“ရခိုင်မှာလည်း စစ်လို့ရအောင် GeneXpert စက်တစ်လုံး ရှိတာကနေ နောက်တစ်လုံး ထည့်လိုက်တယ် စက် (၂) လုံးဖြစ်ပြီ။ နောက်ပြီး Microbiologist (အဏုဇီဝဗေဒပညာရှင်) တွေကိုလည်း အဲဒီကို ပို့လိုက်တယ်လေ။ နောက်ဒီနေ့ပဲ မေ့ဆေးဆရာဝန် (၃) ယောက်ကို ပို့လိုက်တယ် သူတို့က Volunteer (စေတနာ့ဝန်ထမ်း) လုပ်တာ ၊ ကိုယ်တိုင်သွားမယ်တဲ့။ အကယ်၍ မတော်လို့ Ventilator (အသက်ရူစက်) သုံးဖို့လိုတယ်ဆိုရင်လည်း Ventilator သုံးလို့ရအောင်ပေါ့” ဟု ဒေါက်တာ မြင့်ထွေးက ပြောကြားခဲ့သည်။

Leave a Reply

Your email address will not be published. Required fields are marked *