မန္တလေးတွင် COVID – 19 ညွှန်ကြားချက် ညမထွက်ရအမိန့် တင်းကြပ်စွာဆောင်ရွက်မည်

Posted on

COVID-19 ရောဂါကူးစက်ပြန့်ပွားမှု မဖြစ်ပေါ်စေရေးနှင့် ကာကွယ်ထိန်းချုပ်ရေးလုပ်ငန်းများ အထောက် အကူ ဖြစ်စေရန်အတွက် ထုတ်ပြန်ထားသည့် ညမထွက်ရ Curfew အမိန့်ကို တင်းကြပ်စွာဆောင်ရွက်သွား မည်ဖြစ်ကြောင်း မန္တလေးတိုင်းဒေသြကြီး အစိုးရဖွဲ့က သိရသည်။ မန္တလေးတိုင်းဒေသကြီးအတွင်း နေထိုင်ကြသူများအားလုံး ည ၁၂ နာရီမှ နံနက် ၄ နာရီအထိ ညမထွက်ရ Curfew အမိန့်ကို ထုတ်ပြန်ထားသော်လည်းလိုက်နာမှုအားနည်းခြင်းများကြောင့် တင်းကြပ်စွာဆောင်ရွက် ရန် စီစဉ်ခြင်းဟု သိရသည်။

“အဓိကကတော့ ကိုဗစ်ကာကွယ်ရေးအတွက် နေ့စဉ် ည ၁၂ နာရီကနေ နံနက် ၄နာရီအထိ Curfew ထုတ်ပြန်ထားတာ၊ အစောပိုင်းကာလကတော့ လိုက်နာကြတယ်၊ အခုနောက်ပိုင်း လိုက်နာမှုတွေ အား နည်းလာတာတွေကြောင့် တင်းတင်းကြပ်ကြပ်ဆောင်ရွက်သွားဖို့ လုပ်ဆောင်ရတာပေါ့”ဟု မန္တလေး တိုင်းဒေသကြီး အစိုးရဖွဲ့မှ ရှမ်းတိုင်းရင်းသားရေးရာဝန်ကြီးဦးစိုင်းပန်းဆိုင်ကပြောသည် ။ ရှမ်းတိုင်းရင်းသားရေးရာဝန်ကြီး ဦးစိုင်းပန်ဆိုင်းသည် မန္တလေးတိုင်းဒေသကြီး COVID-19 ရောဂါဆိုင်ရာ သတင်းမှန်ပြန်ကြားရေးနှင့် သတင်းမှား ဖြန့်ဝေ သူများအား ရှာဖွေဖော်ထုတ်၍ သတင်းစောင့်ကြည့်ရေး အဖွဲ့ လုပ်ငန်းကော်မတီ ဥက္ကဌအဖြစ် တာဝန်ယူထားသူလည်းဖြစ်သည်။

မန္တလေးတိုင်းဒေသကြီးအတွင်းရှိ မြို့နယ်များတွင် Coronavirus Disease 2019(COVID-19) ရောဂါကူး စက်ပြန့်ပွားမှု မဖြစ်ပေါ်စေရေးနှင့် ကာကွယ်ထိန်းချုပ်ရေးလုပ်ငန်းများအား အထောက်အကူ ဖြစ်စေရန်အ တွက် ညမထွက်ရ Curfew အမိန့်ကို တိုင်းအစိုးရက ထုတ်ပြန်ထားခြင်းဖြစ်ပြီး လေးလကျော်ကြာသည့် ချိန်ထိ အမိန့်ကို ရုပ်သိမ်းခြင်း မရှိသေးဘဲ သြဂုတ် ၃၁ ရက်အထိ တိုးမြှင့်ထားသည်။ “ပြည်သူတွေအနေနဲ့ ညထွက်လို့ မရဘူးဆိုတဲ့အသိကရှိလာဖို့က အရေးကြီးလာပြီ၊ လူတွေကထွက်လို့ ရတယ်ဆိုတော့ ထွက်လာကြတာတွေက အရမ်းများလာတယ်၊ အချို့ကလည်း သတိလက်လွတ်ထွက်ကြ တာပေါ့ ၊ သိသိကြီးနဲ့ထွက်ကြတာလည်း ဖြစ်ချင်ဖြစ်မှာပေါ့လေ၊ အရေးကြီးလာလို့ လုပ်ရတာပါ” ဟု ဦးစိုင်း ပန်းဆိုင်ကဆက်လက်ပြောသည်။

ညမထွက်ရ Curfew အမိန့်ထုတ်ပြန်ထားမှုအပေါ်မလိုက်နာသူများကို တည်ဆဲဥပဒေအရ အရေးယူ မည်ဖြစ်ကြောင်း မန္တလေးတိုင်းအစိုးရက ထုတ်ပြန်ထားသည်။ “ညမထွက်ရအမိန့်ထုတ်ထားတာကို လမ်းပေါ်မှာ ညဥ့်နက်သန်းခေါင်အထိ အမိန်မထုတ်ထားတဲ့ပုံစံနဲ့ သွားလာနေကြတယ်၊ အဲဒီလို သွားလာနေတာတွေက ရောဂါကာကွယ်ရေးဆိုတာထက်ကို လုံခြုံရေးအရ အဆင်မပြေဘူး၊ ဒါကြောင့် ဒီလ ၁၄ ရက်ကစပြီးတော့ ပြန်တင်းကြပ်လိုက်တယ်၊ အဓိကကတော့ လှည့် ကင်းပတ်ကင်းတွေ ပိုလုပ်ပေးနေတယ်”ဟု မန္တလေးတိုင်းဒေသကြီးရဲတပ်ဖွဲ့မှုရုံးမှ ဒုတိုင်းရဲတပ်ဖွဲ့မှူး ရဲမှူး ကြီးမောင်မောင်အေးက ပြောသည်။ အဆိုပါ အမိန့်ထုတ်ပြန်ပြီးနောက်ပိုင်း ကန့်သတ်ချိန်အတွင်း နေအိမ် ပြင်ပ နေထိုင်သွားလာသူများကို ညမထွက်ရအမိန့် ဖောက်ဖျက်ကျူးလွန်မှုဖြင့် ဖမ်းဆီး တရားစွဲ ထောင်ချ မှုများ လုပ်ဆောင်ခဲ့ရာ လူ၁၅၀ပျော်ထိ အရေးယူမှုများလုပ်ထားကြောင်း သိရသည်။

မန္တလေးခရိုင်အတွင်းရှိ အောင်မြေသာစံ၊ ချမ်းအေးသာစံ၊ မဟာအောင်မြေ၊ ချမ်းမြသာစည်မြို့နယ်များတွင် ညမထွက်ရအမိန့် ဖောက်ဖျက်မှုဖြင့် သြဂုတ် ၁၁၊ ၁၂ ရက်ညများက ဖမ်းဆီးအရေးယူခဲ့မှုလူ ၁၅ ဦးနှင့်အ တူ ဇူလိုင် ၂၂ ရက်ကလည်း အမျိုးသား ၇ ဦးကို မဟာအောင်မြေမြို့နယ် တရားရုံးက ထောင်ဒဏ် တစ်လစီ ချမှတ်ခဲ့သလို ဇွန် ၁၇ ရက် ညပိုင်းကလည်း မန္တလေးမြို့ ချမ်းအေးသာစံမြို့နယ်အတွင်း ညမထွက်ရအမိန့် ဖောက်ဖျက်မှုဖြင့် လူ ၁၉ ဦးကို ဖမ်းဆီးတရားစွဲဆိုခဲ့ကာ အလုပ်မဲ့ထောင်ဒဏ် တစ်လစီ ပြစ်ဒဏ်ချမှတ်ခဲ့ ကြောင်း တရားရုံးမှတ်တမ်းများအရ သိရသည်။

Leave a Reply

Your email address will not be published. Required fields are marked *