ရန်ကုန်တိုင်းအတွင်း ညမထွက်ရအမိန့် ၂ လထပ်တိုး

Posted on

ရန်ကုန်တိုင်းဒေသကြီးအတွင်းရှိ မြို့နယ် ၄၅ မြို့နယ်တွင် ဧပြီ ၁၈ ရက်က ထုတ်ပြန်ထားသော ညမထွက်ရအမိန့်ကို ရက်အကန့်အသတ်မရှိအစား နောက်နှစ်လအထိဟု ပြောင်းလဲသတ်မှတ် လိုက်ကြောင်း ဧပြီလ ၂၃ ရက် ရက်စွဲဖြင့် မြို့နယ်အထွေထွေအုပ်ချုပ်ရေး ဦးစီးဌာနမှ တိုင်းဒေသကြီး အစိုးရအဖွဲ့၏ ညွှန်ကြားချက်ဖြင့် ထုတ်ပြန်ကြေညာလိုက်သည်။ယခင်ထုတ်ပြန်ချက်တွင် အချိန်အကန့်အသတ်မပါဝင်ခဲ့သဖြင့် ပိုမိုတိကျမှုရှိစေရန် အချိန်ကာလ ထည့်သွင်းပြီး ထပ်မံကြေညာခြင်းဖြစ်ကြောင်း မင်္ဂလာတောင်ညွန့်မြို့နယ် မဲဆန္ဒနယ် အမှတ်(၁)မှ တိုင်းဒေသကြီးလွှတ်တော်ကိုယ်စားလှယ် ဦးလှဌေးက ပြောသည်။

“နှစ်လအတွင်းမှာ ရောဂါအခြေအနေ ထိန်းချုပ်နိုင်ပြီဆိုရင် နှစ်လပြည့်ရင် ညမထွက်ရအမိန့်က အလိုအလျောက်ပျက်ပြယ်ပြီးသား ဖြစ်သွားမယ်၊ တကယ်လို့ အခြေအနေကို မထိန်းချုပ်နိုင်သေးဘူး ဆိုရင် တော့ သက်တမ်းတိုး ထုတ်ပြန်ချက်တွေ ထပ်ထုတ်ပြန်ရမှာပါ”ဟု ဦးလှဌေးက ဆိုသည်။ပြည်သူများ ရောဂါကူးစက်ခံရမှု မရှိစေရေးနှင့် အချိန်မီထိန်းသိမ်းနိုင်ရေးတို့အတွက် ည ၁၀ နာရီမှ နံနက် ၄ နာရီအတွင်း အရေးကြီးကိစ္စ ပေါ်ပေါက်လာပါက သက်ဆိုင်ရာ၏ ခွင့်ပြုချက်ဖြင့် သွားလာခြင်းမှအပ သွားလာခြင်းမပြုကြရန်နှင့် လိုက်နာခြင်းမရှိပါက တည်ဆဲဥပဒေများအရ အရေးယူသွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

ဧပြီ ၂၂ ရက်က ပြုလုပ်သော နိုင်ငံတော်အတိုင်ပင်ခံပုဂ္ဂိုလ်နှင့် COVID-19 ကာလတွင် စက်ရုံ အလုပ်ရုံများ၊ အလုပ်သမားများ၏ အရေးကိစ္စများနှင့် စပ်လျဉ်း၍ ပါဝင်ဆောင်ရွက်နေကြသူများ ဆွေးနွေး ပွဲတွင် နိုင်ငံတော်အတိုင်ပင်ခံပုဂ္ဂိုလ်က အစိုးရမှထုတ်ပြန်သည့် ညွှန်ကြားချက်များ ပိုမိုရှင်းလင်းတိကျစေရန် ဆောင်ရွက်ပေးသွာမည်ဖြစ်ကြောင်း ပြောကြားခဲ့ပြီးနောက် အချိန်ကာလသတ်မှတ်ချက်ပါဝင်သော ညမထွက်ရ အမိန့်ထပ်မံ ထွက်ရှိလာခဲ့ခြင်း ဖြစ်သည်။

Leave a Reply

Your email address will not be published. Required fields are marked *