လုံခြုံရေးအားနည်းတဲ့ဒေသများမှ ကျောင်းတွေကို ကိုဗစ်စည်းကမ်းနဲ့အညီ မစစ်ဆေးနိုင်တော့

Posted on

အဲဒီကျောင်းတွေကို ကိုဗစ်စည်းကမ်းနဲ့မညီလည်း ဖွင့်ခွင့်ရဖို့ တောင်းဆိုထားတာပါ။ရခိုင်ပြည်နယ်မြောက်ပိုင်းက အခြေခံပညာကျောင်းတချို့၊ ချင်းပြည်နယ် ပလက်ဝမြို့က အခြေခံပညာကျောင်းတစ်ချို့နဲ့ ကချင်ပြည်နယ်အတွင်းက သွားလာရခက်ခဲပြီး ဝေးလံခေါင်ဖျားတဲ့ ဒေသတွေက အခြေခံပညာကျောင်းတစ်ချို့ စုစုပေါင်း ကျောင်းပေါင်း ၁၀၀ ကျော်ကို ကိုဗစ်ကာကွယ်ရေး စည်းကမ်းချက်နဲ့ ညီ၊မညီ မစစ်ဆေးနိုင်တော့ဘဲ ဖွင့်လှစ်သွားတော့မယ်လို့ သိရပါတယ်။

အဆိုပါ ကျောင်းပေါင်း ၁၀၀ ကျော်ဟာ လုံခြုံရေးအားနည်းပြီး ဝေးလံခေါင်ဖျားတဲ့ ဒေသတွေမှာ ရှိနေတာဖြစ်လို့ သွားရောက်စစ်ဆေးဖို့အခက်အခဲတွေရှိနေတာကြောင့် ကိုဗစ်စည်းကမ်းချက်တွေကို ကင်းလွတ်ခွင့်ပေပးဖို့ ကိုဗစ်-၁၉ထိန်းချုပ်ရေး ဗဟိုကော်မတီကို တင်ပြမယ်လို့ အခြေခံပညာဦးစီးဌာန ဒုတိယညွန်ကြားရေးမှူးချုပ် ဒေါက်တာတင်မောင်ဝင်းက ပြောပါတယ်။

“ရခိုင်၊ ချင်း၊ ကချင်နဲ့ ရှမ်းမြောက်ဒေသတွေက ကျောင်းတွေကို ကိုဗစ်စည်းကမ်းချက်တွေ ကင်းလွတ်ပေးပြီး ဖွင့်ခွင့်ရဖို့ တောင်းထားတယ်။ ဒီနေရာတွေ က လမ်းပန်းဆက်သွယ်ရေးအရ၊ နယ်မြေလုံခြုံရေးအရရော သွားစစ်ဆေးဖို့ မဖြစ်နိုင်ဘူး။ အဲဒီလိုနေရာတွေကလည်း ကိုဗစ်က မရှိသလောက်ပါ။ ဒါပေမယ့် ဘင်္ဂလားဒေရှ့်နဲ့နီးတဲ့ ရခိုင်မြောက်ပိုင်းတော့စိုးရိမ်ရတယ်။ အဲဒီနေရာတွေက တော့ မလွယ်လောက်ဘူး ။ လုံခြုံရေးအရလည်း ကျောင်းဖွင့်ဖို့ မလွယ်လောက်ဘူး “ လို့ဒေါက်တာတင်မောင်ဝင်းက ဆိုပါတယ်။

တစ်နိုင်ငံလုံးမှာ ပုဂ္ဂလိကကိုယ်ပိုင်အထက်တန်းကျောင်း၊ ဘုန်းတော်ကြီးသင် အထက်တန်းကျောင်းနဲ့ အခြေခံပညာအထက်တန်းကျောင်း စုစုပေါင်း (၇,၃၇၁) ကျောင်းရှိပြီးဇူလိုင် ၂၁ ရက်ကစတင်ကာ ကိုဗစ်-၁၉ ကာကွယ်ရေး ဆန်းစစ်ချက်ပြည့်မီမှု (A) အဆင့်ရထားတဲ့ကျောင်းပေါင်း (၃,၉၉၉) ကျောင်းဖွင့်လှစ်ခွင့်ရထားတာဖြစ်ပါတယ်။ဒါကြောင့် ဖွင့်လှစ်ဖို့ ကျန်ရှိတဲ့ ကျောင်းတွေထဲက ကျောင်းပေါင်း ၂၀၀၀ ကျော်ဟာ လက်ရှိအချိန်မှာတော့ ကိုဗစ်ကာကွယ်ရေးဆန်းစစ်ချက်ပြည့်မီမှု (A) အဆင့်ရထားပြီး လာမယ့် သြဂုတ်လ ၄ ရက်မှာ ပြန်လည်ဖွင့်လှစ်သွားတော့မယ်လို့လည်း အခြေခံပညာဦးစီးဌာနက သိရပါတယ်။ဒါ့အပြင် ဆန်းစစ်ချက်ပြည့်မီမှု (B) နဲ့ (C) အဆင့်ရထားတဲ့ အခြေခံပညာကျောင်းပေါင်း ၁၀၀၀ ကျော်ကိုလည်း (A) အဆင့်ရဖို့ အတွက် ပြန်လည်ပြင်ဆင်မှုတွေ လုပ်နေပြီး သြဂုတ်လထဲမှာပဲ အပြီးသတ် ဖွင့်လှစ်သွားမယ်လို့ ဆိုပါတယ်။

Leave a Reply

Your email address will not be published. Required fields are marked *