အိန္ဒိယကထုတ်မယ့် ကိုဗစ်ကာကွယ်ဆေးနဲ့ တကမ္ဘာလုံးကို ကူညီမည်

Posted on

အိန္ဒိယနိုင်ငံက ထုတ်မယ့် ကိုဗစ်-၁၉ ကာကွယ်ဆေး ပမာဏဟာ တကမ္ဘာလုံး ကိုဗစ်တိုက်ဖျက်ရေးအတွက် အလုံအလောက် ရရှိနိုင်မှာဖြစ်တယ်လို့ ဝန်ကြီးချုပ် Narendra Modi က အာမခံ ပြောကြားလိုက်ပါတယ်။ ၇၅ နှစ်ပြည့် ကုလသမဂ္ဂ အထွေထွေညီလာခံကို ပေးပို့တဲ့ စနေနေ့ ဗွီဒီယိုမိန့်ခွန်းမှာ သူက ထည့်သွင်း ပြောကြားသွားတာပါ။အိန္ဒိယက ကိုဗစ်ကာကွယ်ဆေး စမ်းသပ်မှုဟာ အဆင့် ၃ ကို ရောက်နေပြီး လူအများအပြားနဲ့ စမ်းသပ်မှုတွေကနေ ထိရောက်ဘေးကင်းပြီး စံသတ်မှတ်ချက်ရှိတဲ့ ကာကွယ်ဆေးအဖြစ် အတည်ပြုလာနိုင်မယ်လို့ ယုံကြည်ကြောင်း၊ ကာကွယ်ဆေး ဖြန့်ဝေပေးဖို့ လိုအပ်တဲ့နိုင်ငံတိုင်းအတွက် ဆေးသိုလှောင်ရေးနဲ့ အအေးခန်းအတွက်ပါ အကူအညီ ပေးသွားနိုင်ကြောင်း ဝန်ကြီးချုပ် Modi က ပြောပါတယ်။

သိပ္ပံပညာရှင်တွေက အတည်ပြုချက်ပေးတာနဲ့ အိန္ဒိယနိုင်ငံက ကိုဗစ်-၁၉ ကာကွယ်ဆေးတွေ အမြောက်အမြားထုတ်ဖို့ အဆင်သင့်ရှိကြောင်း Modi က ပြီးခဲ့တဲ့ သြဂုတ်လထဲမှာ ပြောကြားခဲ့ပါတယ်။ကုလသမဂ္ဂ အတွင်းရေးမှူးချုပ် Antonio Guterres ကလည်း လူတွေ တတ်နိုင်ပြီး နေရာတိုင်းမှာ ဝယ်လို့ရနိုင်မယ့် ပြည်သူ့ကာကွယ်ဆေးတရပ် ပေါ်လာဖို့ကို တွန်းအားပေးခဲ့ပေမယ့် တချို့နိုင်ငံတွေဟာ သူ့ပြည်သူတွေအတွက်သာ ရည်ရွယ် ထုတ်နေတာအတွက် စိတ်ပျက်မိကြောင်း၊ တရားမျှတမှု မရှိကြောင်း အင်္ဂါနေ့က ပြောပါတယ်။

တကမ္ဘာလုံးက ပြည်သူတွေကို ကိုဗစ်ကပ်ရောဂါကနေ အကာအကွယ် မပေးနိုင်သရွေ့တော့ ဘယ်သူ တဦးတယောက်မှ ဒီကပ်ရောဂါကနေ လွတ်မြောက်မှာ မဟုတ်ကြောင်း Guterres က ပြောပါတယ်။

Leave a Reply

Your email address will not be published. Required fields are marked *