အိန္ဒိယက တောင်တရုတ်ပင်လယ်ရှိ အမေရိကန်နှင့်ပူးပေါင်းရန် စစ်သင်္ဘောများ စေလွှတ်

Posted on

၂၀၀၉ ခုနှစ်မှ စတင်၍ တောင်တရုတ်ပင်လယ်၌ ရှီကျင့်ဖျင်အစိုးရက ကျွန်းတုများ ဖန်တီးပြီး စစ်ရေးတည်ဆောက်မှု တိုးချဲ့ခဲ့သည်။ လွန်ခဲ့သည့်ရက်များအတွင်း အဆိုပါ ရေပြင်၌ တရုတ်တို့နှင့်ထိပ်တိုက်တွေ့လျှက်ရှိသည့် အမေရိကန်ရေတပ် ဖျက်သင်္ဘောများနှင့် ပူးပေါင်းရန် အိန္ဒိယစစ်သင်္ဘော ၂-စီး ခုတ်မောင်းသွားပြီဖြစ်ကြောင်း၊ ထို့ပြင် တရုတ်၏ အခြားနိုင်ငံများသို့ ချီတက်ရာလမ်းကြောင်းပေါ်ရှိ အိန္ဒိယသမုဒ္ဒရာနှင့် အထူးသဖြင့် မလက္ကာရေလက်ကြား၌ အိန္ဒိယက ရေတပ်အင်အား ဖြန့်ချလျှက်ရှိသည်ဟု အိန္ဒိယအခြေစိုက် News18 ဒစ်ဂျစ်တယ် မီဒီယာက ယမန်နေ့ရေးသားသည်။

နာရင်ဒြာမိုဒီအစိုးရ၏ သတင်းရင်းမြစ်များကို ကိုးကား၍ ANI မီဒီယာကဖော်ပြချက်ကို News18 က ပြန်လည်ရေးသားရာတွင် နှစ်နိုင်ငံနယ်စပ် “ဂယ်လွမ်” တောင်ကြား၌ တရုတ်တပ်များနှင့် ပဋိပက္ခဖြစ်ပွားခြင်းကြောင့် တပ်ဖွဲ့ဝင် ၂၀ သေဆုံးခဲ့ရပြီး များမကြာမီ တောင်တရုတ်ပင်လယ် ရှေ့တန်းရေပြင်၌ အိန္ဒိယစစ်သင်္ဘောတစ်စီးက နေရာယူထားခဲ့ကြောင်း၊ အဆိုပါရေပြင်မှာ ၎င်းတို့ပိုင်နက်ဖြစ်သည်ဟု ဒေသတွင်း အခြားနိုင်ငံအများစုတို့က တရုတ်ပြည်သူ့လွတ်မြောက်ရေး ရေတပ်မတော်အား ကန့်ကွက်လျှက်ရှိသည့် ဧရိယာအနီး၌ ဖြစ်ကြောင်း ဖော်ပြခဲ့သည်။

အိန္ဒိယရေတပ်စစ်သင်္ဘောအား တောင်တရုတ်ပင်လယ်၌ ရုတ်တရက် တပ်ဖြန့်ချထားရခြင်းမှာ တရုတ်ရေတပ် လှုပ်ရှားမှုနှင့် သံတမန်ရေးနည်းလမ်းဖြင့် တရုတ်နှင့် ဆွေးနွေးစဉ် အိန္ဒိယဘက်၌ လုံခြုံရေးတည်ဆောက်ရန် လိုအပ်ချက်အရ ဖြစ်ကြောင်း၊ အမေရိကန် ရေတပ်၏ ဖျက်သင်္ဘောများနှင့် ဖရီးဂိတ်စစ်သင်္ဘောများ ဖြန့်ချထားရာ တောင်တရုတ်ပင်လယ်အတွင်း၌ အိန္ဒိယသည် မိတ်ဆွေအမေရိကန်တို့နှင့် လုံခြုံစိတ်ချရသော စံနစ်မှတစ်ဆင့် မပြတ်ဆက်သွယ်လျှက်ရှိနေကြောင်း၊ ပုံမှန် စစ်ရေးလေ့ကျင့်မှု၏ တစ်စိတ်တစ်ပိုင်းအနေဖြင့် အခြားနိုင်ငံများ၏ ရေကြောင်း စစ်ရေးလှုပ်ရှားမှုများနှင့်အညီ အိန္ဒိယစစ်သင်္ဘောက အမျက်ဒေါသများကို ရှောင်ရှားလျှက် တက်ကြွစွာ အမြဲအသင့် ဖြစ်လျှက်ရှိကြောင်း သတင်းရင်းမြစ်များက ပြောဆိုသည်။

တစ်ချိန်တည်းမှာပင် အိန္ဒိယရေတပ်မတော်သည် အက်ဒမန်နှင့် နီကိုဗာကျွန်းများအနီး မလက္ကာရေလက်ကြားတစ်လျှောက်၌ ၎င်း၏ရှေ့တန်းစစ်သင်္ဘောများအား တပ်ဖြန့်ထားလျှက်ရှိပြီး အိန္ဒိယသမုဒ္ဒရာအတွင်း ဝင်ရောက်လာသည့် တရုတ်ရေတပ်၏ လှုပ်ရှားမှုမှန်သမျှကို စောင့်ကြည့်လျှက်ရှိကြောင်း၊

အဆိုပါရေပြင်တွင် မလက္ကာရေလက်ကြားကို ဖြတ်၍ အခြားသောတိုင်းပြည်များသို့ ကုန်စည်များတင်ပို့ပြီး ရေနံများ ပြန်လည်သယ်ယူလျှက်ရှိသည့် တရုတ်သင်္ဘောများ သွားလာလျှက်ရှိကြောင်း၊ အိန္ဒိယရေတပ်မတော်အနေဖြင့် အရှေ့ဘက် သို့မဟုတ် အနောက်ဘက် ရှေ့တန်းနယ်မြေနှစ်ရပ်လုံးတွင် ပြိုင်ဘက်များ၏ မတော်တဆ မှားယွင်းမှုများကိုလည်း အပြည့်အ၀ စစ်ဆေးနိုင်ကြောင်း၊

အခြေစိုက်တပ်များ ဖြန့်ချထားသည့် မစ်ရှင်က အိန္ဒိယသမုဒ္ဒရာဒေသနှင့်အနီးတစ်ဝိုက်ရှိ အခြေအနေများကို ထိရောက်စွာ ထိန်းချုပ်နိုင်ကြောင်း၊ ယခုအစီအစဉ်တွင် မလက္ကာရေလက်ကြားမှ အိန္ဒိယသမုဒ္ဒရာဆီသို့ ချဉ်းကပ်လာသည့် လှုပ်ရှားမှုမှန်သမျှကို အနီးကပ်စောင့်ကြည့်နိုင်ရန် လိုအပ်သလို ကိုယ်ပိုင်လှုပ်ရှားနိုင်သည့် ရေအောက်စစ်ရေယာဉ်များ၊ မောင်းသူမဲ့စစ်ယန္တယားများနှင့် အာရုံခံကိရိယာစံနစ်များ ဖြန့်ချထားရေးလည်း ပါဝင်ကြောင်း သတင်း၌ ဆက်လက်ဖော်ပြသည်။

Leave a Reply

Your email address will not be published. Required fields are marked *