၀န်ထမ်းတယောက်ကို ၁နှစ်လုပ်ခလစာ ဒေါ်လာ ၇၀၀၀၀ ပေးတဲ့ သူဌေး

Posted on

ဒီတခါတော့ ထူးထူးခြားခြား သူဌေးတယောက်ရဲ့ အကြောင်းကို ဝေမျှချင်ပါတယ်။ သူ့နာမည်ကတော့ Dan Price ဖြစ်ပြီး ကုမ္ပဏီပိုင်ရှင်တယောက်ဖြစ်တဲ့သူဟာ သူ့ကုမ္ပဏီမှာ တာဝန်ထမ်းဆောင်တဲ့ ဝန်ထမ်းအယောက်စီတိုင်းကို ၁နှစ်လုပ်ခလစာ အနေနဲ့ ဒေါ်လာ ၇သောင်း အနည်းဆုံး သတ်မှတ်ပေးခဲ့တာကြောင့် အားလုံးတအံ့တသြဖြစ်ခဲ့ကြရပါတယ်။ မြန်မာငွေနဲ့ တွက်ကြည့်ပါက သူ့ကုမ္ပဏီမှာ အလုပ်လုပ်တဲ့ ဝန်ထမ်းတိုင်းဟာ ၁နှစ်ကို ကျပ်သိန်းပေါင်း ၉၅၀ထက် မနည်းရနေကြတာဖြစ်ပါတယ်။ ဒီလိုပေးခဲ့တာ အခုမှ မဟုတ်ပဲ ၂၀၁၅ ခုနှစ်ကတည်းက စတင်ပေးခဲ့တာဖြစ်ပါတယ်။

သူ့ကို ဒီလိုဖြစ်အောင်တွန်းအားပေးခဲ့တဲ့ဖြစ်ရပ်ကတော့ လွန်ခဲ့တဲ့ နှစ်အနည်းငယ်က ဖြစ်ခဲ့တာပါ။ အဲဒီအချိန်က သူနဲ့ သူ့ရဲ့မိန်းကလေးသူငယ်ချင်း Valerie တို့ Cascade တောင်ကို အပျော်တမ်းတက်နေကြတဲ့အချိန်ပါ။ တောင်တက်ပြီးတော့ အတူလမ်းလျှောက်ရင်း စကားပြောဖြစ်တယ်။ ဒီမှာတင် Valerie က သူ့ရဲ့အခက်အခဲတချို့ကို ဖွင့်ဟခဲ့ပါတယ်။ အကြွေးတွေတင်နေတဲ့အပြင် အိမ်ရှင်ကလည်း ၁လငှားခ ဒေါ်လာ ၂၀၀ ထပ်တင်လို့ အရမ်းအကြပ်အတည်းဖြစ်နေတယ် ဆိုတဲ့အကြောင်းပါ။

သူငယ်ချင်းရဲ့အကြောင်းကိုကြားတော့ Dan Price အံ့သြသွားသလို စိတ်မသက်မသာလည်းဖြစ်သွားတယ်။ Valerie က စစ်ဘက်ဆိုင်ရာမှာ ၁၁နှစ် အလုပ်လုပ်ခဲ့တယ်။ စစ်ဘက်ကထွက်တော့လည်း အလုပ် ၂ခုမှာ တပတ်နာရီ ၅၀ထက် မနည်းလုပ်နေတယ်။ ဒါတောင်မှ သူမရဲ့လုပ်ခဟာ အသုံးစရိတ်အတွက် မလုံလောက်ဘူးလား ဆိုပြီးတော့ပေါ့။ တကယ်တော့ Valerie ဟာ တလ လုပ်ခ ဒေါ်လာ ၃၀၀၀ ကျော်ရတဲ့သူဖြစ်ပြီး တနှစ်ကို ဒေါ်လာ ၄၀၀၀၀ လောက်ရပါတယ်။ ဒါပေမယ့် ဒီဝင်ငွေဟာ Seattle လိုနေရာမျိုးမှာတော့ အိမ်ကောင်းကောင်းဌားနိုင်ဖို့ မလုံလောက်ပါဘူး။ ဒီအချိန်မှာပဲ Dan Price ဟာ ငါ့ ဝန်ထမ်းတွေရော သူတို့လစာနဲ့ လုံလောက်ရဲ့လားလို့ တွေးမိသွားပါတယ်။

အလုပ်ကြိုးစားမှု နဲ့ အကွက်မြင်မှုတွေကြောင့် Dan Price ဟာ အသက် ၃၁နှစ်အရွယ်မှာတင် Gravity Payments ဆိုတဲ့ ခရက်ဒစ်ကဒ်ကုမ္ပဏီကို တည်ထောင်နိုင်ခဲ့ပြီး သန်းကြွယ်သူဌေးတယောက်ဖြစ်လာခဲ့တယ်။ ဖောက်သည် ၂၀၀၀ ကျော်ရှိပြီး အဲဒီကနေ တနှစ်ကို ဒေါ်လာ ၁.၁သန်းခန့် ရနေပါတယ်။ သူကသာ တနှစ်ကို ဒေါ်လာ ၁သန်းကျော် ဝင်နေပေမယ့် သူ့ဝန်ထမ်းတွေကို လေ့လာကြည့်တဲ့အခါမှာတော့ ဝင်ငွေနဲ့ အသုံးစရိတ် မလောက်ငှမှုတွေ မပြေလည်မှုတွေဖြစ်ကာ ခက်ခဲနေကြတာကို သွားတွေ့တယ်။ တကယ်တော့ Valerie ဆီက အခက်အခဲကို ကြားပြီးမှ အခုလို လေ့လာဖြစ်ခဲ့တာပါ။

ဒီမှာတင် Dan Price ဆုံးဖြတ်ချက်ချခဲ့ပြီး သူ့ကုမ္ပဏီရဲ့ ဝန်ထမ်း တယောက်ချင်းစီကို အနည်းဆုံး တနှစ်လုပ်ခအဖြစ် ဒေါ်လာ ၇၀၀၀၀ ပေးဖို့ သတ်မှတ်လိုက်ပါတယ်။ သူ့ကုမ္ပဏီမှာ ဝန်ထမ်းစုစုပေါင်း ၁၂၀ ရှိတဲ့အတွက် စုစုပေါင်းလိုက်ရင် သူ့ရဲ့တနှစ်အမြတ်ငွေထဲကနေ ၉၀% တောင်လျော့သွားတာဖြစ်ပါတယ်။ ရာခိုင်နှုန်း ၉၀% ကို ဝန်ထမ်းတွေကို ပေးပြီး သူကတော့ ကျန်တဲ့ ၁၀% ပဲ ယူလိုက်တာဟာ အတော်စွန့်စားဝံ့တဲ့ကိစ္စဖြစ်သလို တော်ရုံလူတယောက်လုပ်နိုင်ဖို့လည်း မလွယ်လှပါဘူး။

စီးပွားရေးအရတွက်မယ်ချက်မယ်ဆိုရင်လည်း ဒီအလုပ်မျိုးကို ဘယ်သူမှ လုပ်မှာမဟုတ်ပါဘူး။ ဒါပေမယ့် Dan Price ကတော့ လုပ်ခဲ့တယ်။ ၂၀၁၅ ခုနှစ်ကနေ အဲဒီအစီအစဉ် စလိုက်တာ အခုဆိုရင် ၅နှစ်ထဲရောက်လာပြီဖြစ်ပေမယ့် ဆက်လက်ပေးနိုင်နေဆဲပါ။ ဝန်ထမ်းအယောက်စီတိုင်းဟာ လုံလောက်တဲ့ဝင်ငွေရရှိသွားတာကြောင့် ငွေကြေးအခက်အခဲဆိုတာ သူတို့အတွက် မရှိတော့ပါဘူး။ Dan Price ကြောင့် သူ့ရဲ့ဝန်ထမ်းအားလုံး အိမ်ကောင်းကောင်းမှာနေပြီး ကားကောင်းကောင်းစီးနိုင်ကြပြီဖြစ်ပါတယ်။

Dan Price ဒီလိုပေးတဲ့အကြောင်းကို သိကြတဲ့အခါ ဒီအတိုင်းပေးနေပါက ကုမ္ပဏီရေရှည်ရပ်တည်နိုင်မှာ မဟုတ်ဘူးလို့ အများစုက ထင်ခဲ့ကြပါတယ်။ ၅နှစ်ကြာပြီးတဲ့နောက် ပြီးခဲ့တဲ့ ရက်ပိုင်းကတော့ Dan Price ဟာ သူ့ကုမ္ပဏီရဲ့ ပြောင်းလဲလာမှုအချို့ကို ဖွင့်ဟခဲ့ပါတယ်။ “အခု ဆိုရင် သူ့ရဲ့ကုမ္ပဏီဟာ ၂၀၁၅ ခုနှစ်ကထက် ၃ဆပိုကြီးထွားလာတယ်။ အရင်က အိမ်ပိုင်တဲ့ဝန်ထမ်း အနည်းငယ်ရှိပေမယ့် အခုတော့ အိမ်ဝယ်နိုင်တဲ့ဝန်ထမ်း ၁၀ဆ တိုးလာတယ်။ ဝန်ထမ်း ၇၀% မှာ အကြွေးလုံးဝမရှိတော့ဘူး။ကုမ္ပဏီရဲ့၁လဝင်ငွေဟာလည်း ဒေါ်လာ ၄သန်းအထိရလာတယ်” ဆိုပြီးတော့ပါ။

 

တဦးကမေတ္တာ ၊ တဦးကစေတနာ ဆိုတဲ့ စကားအတိုင်းပါပဲ။ သူတို့အပေါ်ကောင်းတဲ့ ပိုင်ရှင်အပေါ်မှာ ဝန်ထမ်းတွေကလည်း သူတို့တတ်နိုင်သလောက် အစွမ်းကုန်ပြန်ကောင်းခဲ့ ပြန်ကြိုးစားပေးခဲ့ကြလို့အခုလိုပြောင်းလဲလာတာဖြစ်ပါတယ်။ စစပေးချင်းမှာတော့ မသိသာပေမယ့် ၅လခန့်အကြာမှာတော့ ကုမ္ပဏီဟာ သိသိသာသာ စတင်တိုးတက်ခဲ့ပြီး အခုဆိုရင် Dan Price ဟာလည်း အရင်ကထက်ပိုမိုကြွယ်ဝလာနေပြီဖြစ်ပါတယ်။ ဒီလိုဖြစ်လာမယ်ထင်လို့ ရည်ရွယ်ပြီး အခုလိုလစာပေးခဲ့ခြင်းမဟုတ်ပဲ သူ့ဝန်ထမ်းတွေရဲ့ အခက်အခဲကို ပြေလည်စေချင်စိတ်နဲ့သာ ပေးခဲ့ခြင်း ဖြစ်တယ်လို့ Dan Price က ဆိုပါတယ်။ဝန်ထမ်းတွေပေါ်ကြည့်တဲ့သူဌေးအတွက် ဝန်ထမ်းတွေရဲ့စုပေါင်းပေးတဲ့ ကားလက်ဆောင်

Leave a Reply

Your email address will not be published. Required fields are marked *