နှာခေါင်းစည်း ဈေးနှုန်းများပြန်လည်မြင့်တက်လာ

Posted on

အခုရက်ပိုင်းအတွင်း နှာခေါင်းစည်းဈေးနှုန်းတွေဟာ လေးဆနီးပါး ပြန်လည်မြင့်တက်လာခဲ့တယ်လို့ ဆေးနဲ့ဆေးဝါးဆက်စပ်ပစ္စည်း အရောင်းဆိုင်တွေကသိရပါတယ်။ လက်ကားဈေးကွက်ထဲမှာ အခုရေ(၅၀)ပါ နှာခေါင်းစည်းတစ်ဘူးကို အရင်ကကျပ်တစ်ထောင်ကျော်ရှိနေရာကနေ အခုဆိုရင်ကျပ်လေးထောင်အထိဈေးနှုန်းမြင့်တက်နေတာပါ။

ဩဂုတ်လ(၁၆)ရက်နေ့မှာ ပြည်တွင်းကူးစက်မှုတွေ ပြန်လည်တွေ့ရှိချိန်ကစလို့ အခုလိုဈေးနှုန်းတွေမြင့်တက်ခဲ့တာဖြစ်တယ်လို့ ရွှေပြည့်စုံဈေးမှာနှာခေါင်းစည်းလက်ကားရောင်းချနေတဲ့ ကျေးဇူးရှင်ဆေးဆိုင်ပိုင်ရှင် မဇင်မာဦးကအခုလိုပြောပါတယ်။ “စပြီးတော့သူတို့(၈)ယောက်လား၊ (၁၀)ယောက်လားစတွေ့ကတည်းက အရင်ဈေးကွက်ပျက်တာပဲ။ ပထမတစ်ဘူးကိုကျပ်(၁၁၅၀)နဲ့မှာထားတာကိုလာမပို့တော့တာ။ လာမပို့တော့ပဲနဲ့ ညီမထပ်မှာတော့(၆၅၀၀)ကျပ်ဆိုတော့ညီမကမဝယ်တော့တာ။ (၆၅၀၀)ကျပ်ဆိုတော့အဆင်မပြေဘူးလေ”လို့ ကျေးဇူးရှင်ဆေးဆိုင်ပိုင်ရှင်မဇင်မာဦးကပြောပါတယ်။ နှာခေါင်းစည်းလက်လီဈေးကွက်မှာတော့ အရင်ရက်ပိုင်းက တစ်ခုကိုကျပ်(၅၀)နဲ့ရောင်းခဲ့ပေမယ့် အခုဆိုရင်ကျပ်(၂၀၀)ကျပ်အထိဖြစ်လာတယ်လို့ နှာခေါင်းစည်းရောင်းတဲ့ဒေါ်လှလှသန်းကအခုလိုပြောပါတယ်။

“ကျပ်(၅၀)နဲ့စရောင်းတယ်။ (၅၀)ကျပ်ကနေဟိုနေ့ကမနက်ပိုင်းကျတော့ ဈေးတွေတက်ပြီဆိုတော့ (၁၀၀)ကျပ်၊ နောက်(၂၀၀)ကျပ်။ ဝယ်ဈေးကိုကအစတက်လာတာ။ အခုလည်းရောင်းပေးနေတယ်။ တစ်ဘူးကုန်ရင်တစ်ဘူးဝယ်ရောင်းတယ်”လို့ ဒေါ်လှလှသန်းကပြောပါတယ်။ နှာခေါင်းစည်းတွေကို ကိုယ်စားလှယ်ယူရောင်းသူတွေက ဈေးတင်တာတွေရှိတဲ့အတွက် လက်လီ၊လက်ကားရောင်းချသူတွေမှာ အခုလိုဈေးတွေမြင့်တက်လာတာဖြစ်တယ်လို့ ဆေးဆိုင်ပိုင်ရှင်တစ်ချို့ကပြောပါတယ်။နှာခေါင်းစည်းတွေဟာ COVID-19ကာကွယ်၊ ထိန်းချုပ်၊ ကုသရေးဆိုင်ရာကျန်းမာရေးအထောက်အကူပြုပစ္စည်းတွေဖြစ်တဲ့အတွက် ဈေးကစားဖို့ရည်ရွယ်ချက်နဲ့ သိုလှောင်တာတွေတွေ့ရှိပါက အရေးကြီး ကုန်စည်နှင့်ဝန်ဆောင်မှုဥပဒေပုဒ်မ(၅)အရ အရေးယူခံရမှာဖြစ်တယ်လို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက တရားဝင်ထုတ်ပြန်တားမြစ်ထားပါတယ်။

Leave a Reply

Your email address will not be published. Required fields are marked *